ដោយ អ៊ួន ឈិន
2011-11-11
កម្លាំងអាជ្ញាធរស្រុកសណ្ដាន់ ខេត្តកំពង់ធំ នៅព្រឹកថ្ងៃ១0 ខែវិច្ឆិកា បានរារាំងអ្នកយកព័ត៌មានមួយក្រុម មិនឲ្យចូលទៅយកព័ត៌មានអំពីយុទ្ធនាការរបស់ប្រជាសហគមន៍ការពារព្រៃឡង់។
១០-វិច្ឆិកា-២០១១៖ ក្រុមអ្នកយកព័ត៌មានដែលត្រូវអាជ្ញាធរស្រុកសណ្ដាន់ រារាំងមិនឲ្យចូលយកព័ត៌មាននៅតំបន់ព្រៃឡង់ ខេត្តកំពង់ធំ។
អ្នកយកព័ត៌មាន ៥នាក់មកពីស្ថាប័នព័ត៌មានអន្តរជាតិចំនួនបួនអង្គភាព ត្រូវបានកងកម្លាំងអាជ្ញាធរស្រុកសណ្ដាន់ ខេត្តកំពង់ធំ រារាំងមិនឲ្យចូលទៅយកព័ត៌មានអំពីប្រជាសហគមន៍ព្រៃឡង់ដែលកំពុងធ្វើយុទ្ធនាការទប់ស្កាត់ និងបង្ក្រាបបទល្មើសព្រៃឈើនៅតំបន់ព្រៃឡង់ ក្បែរក្រុមហ៊ុនវៀតណាមអភិវឌ្ឍន៍ចម្ការកៅស៊ូ ឈ្មោះ ស៊ី.អា.ស៊ី.ខេ (C.R.C.K)។
អ្នកយកព័ត៌មាននៃអង្គភាពទាំងនោះមាន លោក ម៉ៃ ទិត្យថារ៉ា មកពីកាសែតភ្នំពេញប៉ុស្តិ៍ លោក អ៊ឹម ណាវិន មកពីវិទ្យុបារាំងអន្តរជាតិ លោក ឃួន ណារីម និង លោក ផល វរីហ្ស័រ មកពីព្រឹត្តិបត្រព័ត៌មាន ឌឹ ឃេមបូឌា ដេលី (The Cambodia Daily) ព្រមទាំងលោក អ៊ួន ឈិន មកពីវិទ្យុអាស៊ីសេរី។
អ្នកយកព័ត៌មានទាំង ៥រូប ត្រូវបានកងកម្លាំងនគរបាលមួយក្រុមមានគ្នាប្រមាណ ២០នាក់រារាំងរយៈពេលប្រហែល ១០នាទី នៅចំណុចភូមិជាំប្រអប់ឃុំសណ្ដាន់ ស្រុកសណ្ដាន់ ខេត្តកំពង់ធំ ចម្ងាយប្រមាណ ២០គីឡូម៉ែត្រ ពីទីរួមស្រុកសណ្ដាន់ និង ២០គីឡូម៉ែត្រ ទៅក្រុមហ៊ុន ស៊ី.អា.ស៊ី.ខេ។
ជាដំបូង ក្រុមប៉ូលិសបានសួររកលិខិតបញ្ជាបេសកកម្ម បន្ទាប់មកសួររកប័ណ្ណសំគាល់ខ្លួនរបស់ក្រុមអ្នកយកព័ត៌មាន។ បន្ទាប់មកប៉ូលិសម្នាក់នោះសន្ទនាជាមួយថ្នាក់លើរបស់គាត់តាមទូរស័ព្ទ ក្រោយមកគាត់ប្រាប់ក្រុមអ្នកយកព័ត៌មានឲ្យទៅសុំការអនុញ្ញាតពីលោកឧបនាយករដ្ឋមន្ត្រី ស ខេង ជាមុនសិន។
ក្រុមអ្នកយកព័ត៌មានបានសួរក្រុមមន្ត្រីនគរបាលពីមូលហេតុនៃការរារាំង ប៉ុន្តែគ្មានមន្ត្រីណាម្នាក់បញ្ជាក់ពីមូលហេតុឡើយ។
អ្នកយកព័ត៌មានមកពីកាសែតភ្នំពេញប៉ុស្តិ៍ លោក ម៉ៃ ទិត្យថារ៉ា ថ្លែងថា ទង្វើរបស់មន្ត្រីអាជ្ញាធរគឺផ្ទុយនឹងច្បាប់សារព័ត៌មាន៖ មានន័យថា គាត់ចង់បំបិទសិទ្ធិអ្នកសារព័ត៌មានមិនឲ្យចូលយកព័ត៌មានពីប្រជាពលរដ្ឋដែលធ្វើការតវ៉ា។ អ៊ីចឹងមានន័យថា គាត់កាន់ជើងក្រុមហ៊ុន ដោយមិនបានគិតពីប្រយោជន៍របស់ប្រជាពលរដ្ឋដែលបានតវ៉ា ការពារព្រៃឈើសម្រាប់ផ្គត់ផ្គង់ជីវភាពរបស់ពួកគាត់។
អ្នកយកព័ត៌មាននៃវិទ្យុបារាំងអន្តរជាតិ (RFI) លោក អ៊ឹម ណាវិន យល់ឃើញថា ការដែលកម្លាំងអាជ្ញាធររារាំងក្រុមអ្នកយកព័ត៌មាន គឺជាចេតនាបិទបាំងបទល្មើសព្រៃឈើ ដែលកំពុងតែកើតមាននៅតំបន់ព្រៃឡង់។
ក្នុងអំឡុងពេលនៃការរារាំង មន្ត្រីនគរបាលបានហាមក្រុមអ្នកយកព័ត៌មានថតរូបភាព ឬវីដេអូជាប់កងកម្លាំងប្រដាប់អាវុធ។
ជាចុងក្រោយ មន្ត្រីនគរបាលមួយរូបបានចេញមកប្រាប់ថា ក្រុមអ្នកយកព័ត៌មានអាចបន្តដំណើរទៅមុខ ឆ្ពោះទៅក្រុមហ៊ុន ស៊ី.អា.ស៊ី.ខេ បាន ហើយមន្ត្រីដដែលបានសុំទោសក្រុមអ្នកយកព័ត៌មានចំពោះការធ្វើឲ្យខាតពេលវេលា៕
No comments:
Post a Comment