Tuesday, March 1, 2011

អនុ​ប្រធាន​សភា​គ្រោង​ចាត់​វិធានការ​ទប់ស្កាត់​ការ​បំផ្លាញ​ព្រៃឡង់


អនុ​ប្រធាន​សភា​គ្រោង​ចាត់​វិធានការ​ទប់ស្កាត់​ការ​បំផ្លាញ​ព្រៃឡង់

2011-02-26
អនុ​ប្រធាន​ទី​១​នៃ​រដ្ឋ​សភា លោក ងួន ញ៉ិល បាន​គ្រោង​ថា នឹង​ចាត់​វិធានការ​ទប់​ស្កាត់​ការ​បំផ្លិចបំផ្លាញ​ព្រៃ​ឈើ​នៅ​តំបន់​ព្រៃឡង់ ពី​សំណាក់​ក្រុមហ៊ុន​វៀតណាម។
RFA/Kim Peou
ក្រុម​អ្នក​ភូមិ​ដែល​មក​តវ៉ា​ដើម្បី​ទប់​ ស្កាត់​ការ​កាប់​បំផ្លាញ​ព្រៃឈើ​នៅ​តំបន់​ព្រៃឡង់ ស្ថិត​ក្នុង​ខេត្ត​កំពង់ធំ កាល​ពី​ថ្ងៃ​ទី​២៤ ខែ​កុម្ភៈ ឆ្នាំ​២០១១។
ខុទ្ទកាល័យ​អនុ​ប្រធាន​ទី​១​នៃ​រដ្ឋ​សភា បាន​ឲ្យ​ដឹង​ថា លោក ងួន ញ៉ិល អនុ​ប្រធាន​ទី​១​នៃ​រដ្ឋ​សភា បាន​គ្រោង​នឹង​ចាត់​វិធានការ​ក្នុង​ពេល​ដ៏​ខ្លី​ខាង​មុខ​នេះ ដើម្បី​បង្ក្រាប​ការ​បំផ្លាញ​ព្រៃឡង់ ក្រោយ​ពី​អ្នក​ភូមិ​បាន​តវ៉ា​អំពី​ការ​បំផ្លិចបំផ្លាញ​ព្រៃឡង់ ដើម្បី​ដាំ​ដើម​កៅស៊ូ​ពី​សំណាក់​ក្រុមហ៊ុន​វៀតណាម ឈ្មោះ CRCK (Chu Se Rubber Company Kampong Thom) និង​ឈ្មោះ PNT group រួច​មក។
ទីប្រឹក្សា​របស់​អនុ​ប្រធាន​ទី​១​នៃ​រដ្ឋ​សភា លោក ប៉ុល ប៊ុនថន បាន​ថ្លែង​ប្រាប់​វិទ្យុ​អាស៊ីសេរី នៅ​ថ្ងៃ​សៅរ៍ ទី​២៦ ខែ​កុម្ភៈ​ថា លោក​សុំ​ឲ្យ​អ្នក​ភូមិ​សរសេរ​ញត្តិ​ប្ដឹង​អំពី​មន្ត្រី​ណា​ដែល​មាន​ទាក់ទង​ ទៅ​នឹង​ការ​កាប់​បំផ្លាញ​ព្រៃ​ឈើ​នៅ​តំបន់​ព្រៃឡង់ ហើយ​និង​ឈ្មោះ​ក្រុមហ៊ុន​ណា​ខ្លះ​ដែល​កំពុង​ធ្វើ​សកម្មភាព ហើយ​គេ​នឹង​ចាត់​វិធានការ​នៅ​ពេល​បាន​ទទួល​បណ្ដឹង​នោះ។
មន្ត្រី​រូប​នេះ​ដែល​កំពុង​ធ្វើ​ដំណើរ​ចូល​ទៅ​ក្នុង​ស្រុក​សណ្ដាន់ ដើម្បី​តាម​ដាន​ការ​ទន្ទ្រាន​ព្រៃឡង់ បាន​បញ្ជាក់​ថា នេះ​គឺ​ជា​ការ​កាប់​បំផ្លាញ​ព្រៃ​ធម្មជាតិ​ដែល​មិន​អាច​ទទួល​យក​បាន ៖ «ខ្ញុំ ​យល់​ថា ជា​ការ​បំផ្លាញ​ធនធាន​ធម្មជាតិ ដែល​ជា​សម្បត្តិ​ជាតិ​មួយ​ដែល​យើង​មិន​អាច​ទទួល​យក​បាន។ រាជ​រដ្ឋាភិបាល​ឥឡូវ​កំពុង​តែ​បំបាត់​ការ​កាប់​បំផ្លាញ​ព្រៃឈើ​របស់​រដ្ឋ​ ហ្នឹង។ អ៊ីចឹង​ហើយ សំណូមពរ​របស់​ខ្ញុំ គឺ​សុំ​ឲ្យ​ប្រជាជន​សរសេរ​ញត្តិ ពាក្យ​បណ្ដឹង​ថា មាន​ប៉ុន្មាន​គ្រួសារ ហើយ​មាន​ឈ្មោះ​ណា​ខ្លះ ហើយ​ក្រុមហ៊ុន​អី ដាក់​ឲ្យ​ចំ​ក្រុមហ៊ុន​នោះ​មក»
ប្រភព​ពី​មន្ត្រី​ការពារ​ព្រៃ​ឈើ​បាន​អះអាង​ថា ព្រៃឡង់​ដែល​មាន​ព្រំ​ប្រទល់​ជាប់​ខេត្ត​ចំនួន​៤ គឺ​ខេត្ត​ក្រចេះ ព្រះវិហារ ស្ទឹងត្រែង និង​ខេត្ត​កំពង់ធំ កំពុង​ទទួល​នូវ​ការ​បំផ្លាញ​យ៉ាង​ធ្ងន់ធ្ងរ​ក្នុង​រយៈពេល​ប្រហែល ៣​ខែ​ចុង​ក្រោយ​នេះ ដោយ​ក្រុមហ៊ុន​វៀតណាម ដាំ​ដើម​កៅស៊ូ​ឈ្មោះ CRCK និង​ក្រុមហ៊ុន PNT ក្រោយ​ពី​ក្រុមហ៊ុន​នេះ​បាន​ទទួល​ច្បាប់​អនុញ្ញាត​ឲ្យ​ដាំ​ដើម​កៅស៊ូ​នៅ​ ព្រៃឡង់ ក្រោម​ការ​អះអាង​ថា ព្រៃ​នោះ​ជា​ព្រៃ​រិចរិល។
ដើម​ឈើ​ប្រណិត​ធំៗ ដែល​ជា​ច្បោះ និង​ជា​ដើម​ជ័រទឹក ដូចជា​ប្រភេទ​បេង នាងនួន ឈើទាល ដូងចែម និង​ដើម​កកោះ​ជា​ដើម ត្រូវ​បាន​គេ​ផ្ដួល​រំលំ​ជា​ច្រើន​ពាន់​ដើម រាយប៉ាយ​ពេញ​ព្រៃ។
ប្រភព​ពី​អ្នក​អភិរក្ស​ព្រៃ​ដដែល​បាន​អះអាង​ថា អ្នក​ភូមិ​នៃ​ខេត្ត​ទាំង​បួន​នោះ ប្រមាណ ២​ម៉ឺន​គ្រួសារ សុទ្ធសឹងតែ​ជា​អ្នក​រក​ទទួល​ទាន​ពី​អនុផល​ព្រៃឈើ ដូចជា​រក​ជ័រ រក​វល្លិ និង​រក​ថ្នាំ​បូរាណ នឹង​ប្រឈម​មុខ​ចំពោះ​បញ្ហា​ជីវភាព​នៅ​ពេល​ដែល​ព្រៃស្រោង​មួយ​នេះ ត្រូវ​បាន​គេ​បំផ្លាញ​ចោល​ដើម្បី​ដាំ​ដើម​កៅស៊ូ​នៅ​ពេល​ខាង​មុខ។
កាល​ពី​ថ្ងៃ​ទី​២២ ខែ​កុម្ភៈ រហូត​ដល់​ថ្ងៃ​ទី​២៤ ខែ​កម្ភៈ កន្លង​ទៅ តំណាង​អ្នក​ភូមិ​ប្រហែល ៤០០​នាក់ បាន​នាំ​គ្នា​ដើរ​ចូល​ទៅ​ក្នុង​ព្រៃ ដើម្បី​ធ្វើការ​តវ៉ា​ទាមទារ​ឲ្យ​បញ្ឈប់​ការ​កាប់​បំផ្លាញ​ព្រៃឈើ ប៉ុន្តែ​ត្រូវ​បាន​អាជ្ញាធរ​ខេត្ត​កំពង់ធំ រារាំង​មិន​ឲ្យ​ចូល​ទៅ​មើល​ការ​កាប់​បំផ្លាញ​ព្រៃឈើ​ឡើយ។
មក​ដល់​ពេល​នេះ តំណាង​សហគមន៍​ព្រៃឡង់ សុំ​មិន​បញ្ចេញ​ឈ្មោះ ថ្លែង​ថា ការ​គំរាមកំហែង សម្លុត​ចាប់​ខ្លួន​អ្នក​ភូមិ បាន​ធ្វើ​ឡើង​កាន់​តែ​ខ្លាំង​ក្រោយ​ការ​តវ៉ា។
អ្នក​ភូមិ​ប្រហែល ៥​នាក់ នៅ​ឃុំ​ដងកាំបិត ឃុំ​ស្វាយ ស្រុក​សណ្ដាន់ ខេត្ត​កំពង់ធំ កំពុង​រស់​នៅ​គេច​ពួន​ពី​ការ​តាមដាន​របស់​អាជ្ញាធរ​មូលដ្ឋាន​នៅ​ពេល​នេះ ៖ «ព្រឹកមិញ (២៦ កុម្ភៈ) ឮ​ថា ចេញ​ទៅ​ណា​មក​ណា​មាន​ការ​លំបាក ដោយសារ​តែ​មាន​ការ​អង្កេត​មើល​ពេល​ចេញ​ដើរ​ហើរ​ទៅ​ណា​មក​ណា។ ខ្ញុំ​ថា ជា​សិទ្ធិ​របស់​ប្រជាពលរដ្ឋ គេ​ចោទ​យើង​ថា ញុះញង់​ប្រមែប្រមូល​បាតុកម្ម។ គាត់​ព្រួយ​បារម្ភ​សឹងតែ​មិន​ហ៊ាន​នៅ​ផ្ទះ ដោយសារ​តែ​ការ​គំរាមកំហែង​អ៊ីចេះ​មួយ​អ៊ីចុះ​មួយ...»
ទាក់ទង​នឹង​សំណើ​របស់​ខុទ្ទកាល័យ​របស់​អនុ​ប្រធាន​ទី​១​នៃ​រដ្ឋ​សភា តំណាង​សហគមន៍​ព្រៃឡង់ បាន​មាន​ប្រសាសន៍​ថា ការ​គំរាមកំហែង​គាប​សង្កត់​យក​លេស​បញ្ហា​ផ្សេងៗ ដើម្បី​ចោទ​ប្រកាន់​អ្នក​ភូមិ បាន​នាំ​ឲ្យ​អ្នក​ភូមិ​ព្រួយ​បារម្ភ ប៉ុន្តែ​ពួកគេ​នឹង​បន្ត​ការ​ទាមទារ​ត​ទៅ​ទៀត ៖ «ឯកឧត្ដម ងួន ញ៉ិល ថា ឲ្យ​ធ្វើ​មេដៃ​ដាក់​ញត្តិ​ដាក់​អី​ហ្នឹង គាត់​ចង់​ធ្វើ​ណាស់ ប៉ុន្តែ​ទៅ​មិន​រួច។ អាជ្ញាធរ​មូលដ្ឋាន​មាន​ការ​តាមដាន និង​គំរាមកំហែង ដូច​ថា សួរ​នាំ​តាមដាន គេ​ថា ដាក់​ទៅ​ណា ប្តឹង​ទៅ​ណា? ចេះ​តែ​ផ្ដិត (មេដៃ) ប្ដឹង​អត់​មាន​អី​ចោទ​ប្រកាន់ ចេះ​តែ​ចោទ​ប្ដឹង​ថា ជិះ​ម៉ូតូ​អត់​កញ្ចក់​អត់​អី។ ប៉ុន្តែ​សហគមន៍​ទាំង ៤​ខេត្ត នឹង​ធ្វើការ​ព្យាយាម​តស៊ូ​ដើម្បី​ឲ្យ​នាយករដ្ឋមន្ត្រី​ដឹង​ថា កន្លែង​ហ្នឹង​ប៉ះពាល់​ណាស់»
កាល​ពី​ថ្ងៃ​ទី​២៤ ខែ​កុម្ភៈ កន្លង​ទៅ នៅ​គ្រា​ដែល​ប្រជាជន​សុំ​ចូល​ទៅ​មើល​កន្លែង​កាប់​បំផ្លាញ​ព្រៃ​ឈើ​របស់​ ក្រុមហ៊ុន CRCK អាជ្ញាធរ​គ្រប់​ជាន់​ថ្នាក់ មាន​មន្ត្រី​ប៉ូលិស ស្នងការ​ប៉ូលិស​ខេត្ត មន្ត្រី​រដ្ឋបាល​ព្រៃឈើ មន្ត្រី​សុ្រក ភូមិ ឃុំ  បាន​បណ្ដេញ​អ្នក​ភូមិ​ចេញ​ពី​ព្រៃ ដោយ​អះអាង​ថា អ្នក​ភូមិ​ធ្វើការ​តវ៉ា​ខុស​ច្បាប់ ពីព្រោះ​ព្រៃ​នោះ​មិន​មែន​ជា​ព្រៃ​របស់​សហគមន៍​ឡើយ ហើយ​ការ​អភិវឌ្ឍ គឺ​ជា​សិទ្ធិ​របស់​រដ្ឋាភិបាល។
កាល​ពី​ថ្ងៃ​ទី​១០ ខែ​កុម្ភៈ កន្លង​ទៅ នៅ​ក្នុង​ឱកាស​ចែក​សញ្ញាបត្រ​ដល់​និស្សិត​កសិកម្ម លោក​នាយករដ្ឋមន្ត្រី ហ៊ុន សែន បាន​ថ្លែង​ទទួល​ស្គាល់​សម្បត្តិ​ធម្មជាតិ និង​ហាម​ប្រាម​មិន​ឲ្យ​មាន​ការ​កាប់​បំផ្លាញ​ព្រៃ​ធម្មជាតិ ដើម្បី​ដាំ​ដើម​កៅស៊ូ​នោះ​ទេ។
លោក​មាន​ប្រសាសន៍​បន្ត​ដូច្នេះ ៖ «យើង​មិន​អាច​កាប់​ព្រៃ​ស្រោង​ដាំ​ កៅស៊ូ មិន​បាន​ទេ​អា​ហ្នឹង ដើម្បី​ធ្វើ​កសិកម្ម​នោះ​ទេ អត់​លេង​ចូល​ទេ​អា​ហ្នឹង។ តំបន់​ណា​ដែល​អាច​ធ្វើ​កសិកម្ម​បាន យើង​ធ្វើ ប៉ុន្តែ​យើង​មិន​អាច​ទៅ​កាប់​ដើម​ឈើ​ហ៊ុប​ធំៗ រួច​ហើយ​ដាំ​ដើម​កៅស៊ូ​ទេ អត់​ទេ អត់​លេង​ចូល​ទេ...»
ប្រភព​ពី​អ្នក​ភូមិ​អះអាង​ថា ព្រៃឡង់​បាន​ទទួល​រង​នូវ​ការ​បំផ្លិចបំផ្លាញ​ចាប់​តាំង​ពី​ឆ្នាំ​២០០០​មក ដែល​មក​ដល់​ពេល​នេះ ការ​បំផ្លាញ​នោះ​មាន​ប្រហែល ៦០% ហើយ។
ក្រុម​សហគមន៍ អ្នក​ការពារ​ព្រៃឡង់ បាន​ឲ្យ​ដឹង​ទៀត​ថា ពួកគេ​កំពុង​ប្រជុំ​គ្នា​រិះរក​មធ្យោបាយ​នៃ​ការ​តវ៉ា​ជា​ថ្មី​ទៀត ដើម្បី​ចូល​ទៅ​ក្នុង​ព្រៃ ហើយ​ការ​តវ៉ា​នេះ​នឹង​បន្ត​រហូត​ដល់​ការ​កាប់​ទន្ទ្រាន​ព្រៃឡង់​ត្រូវ​បាន​ បញ្ចប់៕

For more information please link here



Welcome all comments on this blog

No comments:

Powered By Blogger