Thursday, April 21, 2011

សេចក្តីប្រកាសព៌ត័មាន អំពី ការប្រើអំពើហិង្សារបស់កងកំលាំងប្រដាប់អាវុធមកលើអ្នកភូមិបឹងកក់



សេចក្តីប្រកាសព៌ត័មាន
អំពី
ការប្រើអំពើហិង្សារបស់កងកំលាំងប្រដាប់អាវុធមកលើអ្នកភូមិបឹងកក់
សមាគមអាដហុកការពារសិទ្ធិមនុស្ស និងអភិវឌ្ឍន៏នៅកម្ពុជាថ្កោលទោសចំពោះការប្រើអំពើ​ហិង្សា​​របស់សមត្ថកិច្ចចម្រុះ​ ដែលបានវាយបង្រ្កាបទៅលើអ្នកភូមិរងគ្រោះបឹងកក់ ដោយគ្រាន់តែធ្វើការ​ទាមទារ តវ៉ាដោយអហឹង្សា នៅមុខសាលា​រាជ​ធានីភ្នំពេញ កាលព្រឹកថ្ងៃទី២១ ខែមេសា ឆ្នាំ២០១១​នេះ។
អ្នកភូមិបឹងកក់បានទាមទារ អស់រយៈពេលជាង៥ឆ្នាំកន្លងមកហើយ បន្ទាប់ពីរដ្ឋាភិបាលបាន​យកដីអ្នកភូមិ​ប្រគល់​ឲ្យក្រុមហ៊ុនស៊ូកាគុអ៊ីនកាលពីឆ្នាំ២០០៧កន្លងមក។​ ទំនាស់ដីបឹងកក់ មិនទទួល បានការដោះស្រាយដ៏ត្រឹមត្រូវនៅឡើយ។ រហូតមកដល់សព្វថ្ងៃនេះ ពួកគាត់បាននាំគ្នាបន្តការទាម ទារ ទទូចចង់ឲ្យសាលា​រាជធានីភ្នំពេញ​ជួយដោះស្រាយ ដីអភិវឌ្ឍន៏នៅ​នឹង​កន្លែង ស្របតាមគោល​នយោបាយដោះស្រាយរបស់រដ្ឋាភិបាល និងដោះស្រាយផ្ទះរបស់ពួកគាត់ដែលត្រូវបាន​លិចលង់​ដោយសារ​ក្រុមហ៊ុនបូម​ខ្សាច់ពន្លិចជាបន្តបន្ទាប់មក។ នៅព្រឹកនេះបន្ទាប់ពីមានការជួប​ពិភាក្សា ជាមួយ​តំណាង​សាលារាជ​ធានីភ្នំពេញរួចមក ក្រុម​សហគមន៏​នៅតែបន្តការទាមទារតវ៉ា ពីព្រោះមិនមាន​លទ្ធផលជាវិជ្ជមាន។​ កងកំលាំងប្រដាប់អាវុធ​រាប់រយនាក់ ក៏បានចូលវាយបំបែកអ្នកភូមិ ដោយ​ធ្វើការ​វាយ​ដំ ឆក់នឹងដំបងឆក់​ ទាត់​ ធាក់ ទៅលើអ្នក ភូមិយ៉ាងសាហាវឃោឃៅ នៅចំពោះមុខមន្ត្រីសាលា​រាជ​​ធានី ដែលកំពុង​តែ​ឈរឳបដៃមើលការ​ប្រើ​អំពើ​ហិង្សានេះ។
សមាគមអាដហុកឃ្លាំមើលយ៉ាងហ្មត់ចត់ បានឃើញហេតុការណ៏ដោយ​ផ្ទាល់ភ្នែកនៅក្នុង​អំពើវាយ​បង្រ្កាបនេះ យ៉ាងហោចណាស់មានអ្នកភូមិ៤នាក់ទទួលរងរបួសសន្លប់បែកក្បាលហូរឈាម នៅនឹង​កន្លែង ដោយសារកងកំលាំងវាយដំ ឆក់នឹងដំបងឆក់ អ្នកភូមិ១១នាក់ផ្សេងទៀត ត្រូវបាន​ចាប់ខ្លួនដាក់​ក្នុង​ឡាន​ទ្រុង​ពីកន្លែងកើត​ហេតុ ។ សកម្មភាពវាយបង្រ្កាបនេះ កំលាំងប្រដាប់អាវុធបាន ប្រើដំបងវាយដំ ឆក់នឹងដំបងឆក់ ទាត់​ ធាក់ និងតាមរកចាប់ខ្លួនទៅលើក្រុមបាតុករជាបន្តបន្ទាប់ មើល​ទៅគួរឲ្យរន្ធត់។   
សមាគមអាដហុកចាត់ទុកអំពើហិង្សានេះថា គឺជាការរំលោភសិទ្ធិមនុស្សធ្ងន់ធ្ងរ​ដែលធានា​ដោយ​រដ្ឋធម្មនុញ្ញ និងសេចក្តីថ្លែងការណ៏ជាសកលស្តីពីសិទិ្ធមនុស្ស ។ ការប្រើអំពើហិង្សារបៀបនេះ​មិនមែន​ជាដំណោះស្រាយ​ដែលចាំបាច់ត្រូវយកមកប្រើប្រាស់ជាមួយនឹងប្រជាពលរដ្ឋ​ ដែលទទួលរង​នូវផល​ប៉ះពាល់ក្នុងទំនាស់ដីធ្លីនោះទេ ។ ​ អំពើហិង្សានេះផ្តើមចេញពីកំលាំងប្រដាប់អាវុធចម្រុះ នៅ​ចំពោះមុខមន្ត្រីសាលារាជធានី ដែលបើកដៃឲ្យ​មាន​ការ​វាយបង្ក្រាបទៅលើអ្នកភូមិយ៉ាងសាហាវ​បែបនេះ ។​ ជុំវិញករណីទំនាស់ដីធ្លីនៅបឹងកក់​នេះ សាលារាជធានីមិនត្រឹមតែ​មិនបាន​រក​ដំណោះ​ស្រាយជូនអ្នកភូមិរងគ្រោះប៉ុណ្ណោះទេ គេថែមទាំងប្រើអំណាច និងកំលាំងប្រដាប់អាវុធ ឲ្យទៅវាយ​ដំ​លើអ្នកភូមិរងគ្រោះ ហើយទាត់ចោលនូវសិទិ្ធក្នុងការទាមទារតវ៉ា របស់​អ្នក​ភូមិដែលធ្វើដោយអហិង្សា។
សមាគមអាដហុក សូមអំពាវនាវដល់ភ្នាក់ងាររដ្ឋាភិបាល ពិសេសសាលារាជធានីភ្នំពេញ សូមបញ្ឈប់ជាបន្ទាន់ចំពោះការប្រើអំពើហិង្សា​ទៅលើប្រជាពលរដ្ឋ​ដែលធ្វើការតវ៉ាដោយអហិង្សា និង​សូមអំពាវនាវ​ដល់​ស្ថាប័ន​​ជាតិ និងអន្តរជាតិទាំងអស់ សូមជួយឲ្យមានការស៊ើបអង្កេត ​ចាត់​វិធានការ​តាម​ផ្លូវ​ច្បាប់​ចំពោះ​ការ​​ប្រើអំពើហិង្សាដ៏ព្រៃផ្សៃនេះ សូមឲ្យដោះលែង ព្រមទាំងបញ្ឈប់​ការតាមចាប់​ខ្លួន​អ្នកភូមិ​តទៅ​ទៀត និងបន្តការដោះស្រាយទំនាស់ដីធ្លីនេះ ដោយសន្តិវិធី ។​ ​ 

ភ្នំពេញ  ថ្ងៃទី២១ ខែមេសា ឆ្នាំ២០១១
ព័ត៌មានបន្ថែមសូមទំនាក់ទំនងតាមទូរស័ព្ទ
-លោក ចាន់ សុវ៉េត ប្រធានផ្នែកសិទ្ធិមនុស្សនៃសមាគមអាដហុក  ០១៦ ៩៣៧  ៥៩១
-លោក នី ចរិយា ប្រធានផ្នែកសិទ្ធិដីធ្លីនៃសមាគមអាដហុក            ០១១ ២៧៤ ៩៥៩     


Welcome all comments on this blog
Post a Comment