Wednesday, September 14, 2011

មតិ​រិះគន់​​ចំពោះ​​ការ​ប្រតិបត្តិ​ការងារ​ក្នុង​រដ្ឋាភិបាល​កម្ពុជា


មតិ​រិះគន់​​ចំពោះ​​ការ​ប្រតិបត្តិ​ការងារ​ក្នុង​រដ្ឋាភិបាល​កម្ពុជា

2011-09-06
ក្រុម​អ្នក​តាម​ឃ្លាំមើល​ស្ថានការណ៍​នយោបាយ​នៅ​កម្ពុជា បាន​លើក​ឡើង​ថា ប្រទេស​កម្ពុជា កំពុង​តែ​អនុវត្ត​ច្បាប់​បែប​អានាធិបតេយ្យ។
RFA/Sok Serey
១៥-មិថុនា-២០១១៖ លោក​នាយករដ្ឋមន្ត្រី ហ៊ុន សែន ថ្លែង​ក្នុង​ឱកាស​ចែក​សញ្ញាបត្រ​ដល់​និស្សិត​នៅ​សាកលវិទ្យាល័យ​វិទ្យាសាស្ត្រ​សុខាភិបាល រាជធានី​ភ្នំពេញ។
អ្នក​ឃ្លាំមើល​ស្ថានការណ៍​នយោបាយ​បាន​រិះគន់​ថា ការ​បង្ក្រាប​បទល្មើស​នីមួយៗ​ដែល​កើត​មាន​ក្នុង​សង្គម អាច​ធ្វើ​ឡើង​ទៅ​បាន​លុះ​ត្រា​តែ​មាន​បញ្ជា​ពី​អ្នក​ដឹក​នាំ​ប្រទេស ទើប​មន្ត្រី​ក្រោម​បង្គាប់​ចាប់​ផ្តើម​មាន​វិធានការ​បង្ក្រាប​បទល្មើស​ទាំង​នោះ។ 
ក្រុម​អ្នក​តាម​ដាន​ស្ថានការណ៍​នយោបាយ​បាន​លើក​ឧទាហរណ៍​កន្លង​មក ដូចជា​ករណី​បង្ក្រាប​កុងត្រូល​ជជុះ ការ​បង្ក្រាប​បទល្មើស​នេសាទ និង​ការ​បញ្ជា​ឲ្យ​មន្ត្រី​ក្រសួង​ពាក់ព័ន្ធ​ពិនិត្យ​មើល​លើ​ករណី​កម្មករ​រោងចក្រ​ពុល​សន្លប់ កាល​ពី​ពេល​ថ្មីៗ​នេះ​ជាដើម។
ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា លោក អ៊ូ វីរៈ បាន​ពន្យល់​ថា មន្ត្រី​អនុវត្ត​ច្បាប់​របស់​រដ្ឋាភិបាល​មួយ​ចំនួន​បច្ចុប្បន្ន​លែង​គិត​អំពី​ការ​អនុវត្ត​ច្បាប់​ត្រឹមត្រូវ​ហើយ ព្រោះ​គេ​គិត​ថា ការ​អនុវត្ត​ច្បាប់​នោះ​វា​នឹង​មិន​មាន​ផលប្រយោជន៍​សម្រាប់​ពួកគាត់​ទេ ដូច្នេះ​គេ​គិត​អំពី​ផល​ប្រយោជន៍​ផ្ទាល់​ខ្លួន​ច្រើន​ជាង ហើយ​រង់ចាំ​ការ​បញ្ជា​ពី​នាយករដ្ឋមន្ត្រី​ម្ដងម្កាល ទើប​គេ​ចាប់​ផ្ដើម​ប្រតិបត្តិ​ការងារ​នោះ។
នាយក​ប្រតិបត្តិ​វិទ្យាស្ថាន​ខ្មែរ​ដើម្បី​លទ្ធិប្រជាធិបតេយ្យ លោក ហង្ស ឆាយា បាន​បញ្ជាក់​ថា ការ​អនុវត្ត​ច្បាប់​នៅ​ប្រទេស​កម្ពុជា ផ្ទុយ​ពី​របប​លទ្ធិប្រជាធិបតេយ្យ ពីព្រោះ​ថា ការ​អនុវត្ត​ច្បាប់​នៅ​ថ្នាក់​មូលដ្ឋាន​គេ​ធ្វើ​ទៅ​តាម​ទម្លាប់ ចាំ​តែ​ទទួល​បញ្ជា​ពី​ថ្នាក់​ដឹកនាំ​ប្រទេស​បញ្ជា ដែល​បញ្ហា​នេះ​ជា​បញ្ហា​មួយ​មិន​មាន​និរន្តរភាព​នោះ​ឡើយ។
Post a Comment