ដោយ យន់ សាមៀន
2011-10-21
មន្ត្រីផ្នែកច្បាប់ និងអគ្គលេខាធិការរងនៃអង្គការសហប្រជាជាតិ (អ.ស.ប.) អ្នកស្រី ប៉ាទ្រីស៊ីយ៉ា អូប្រាយអេន កាលពីថ្ងៃទី២០ តុលា បានព្រមានរដ្ឋាភិបាលមិនឲ្យធ្វើសេចក្ដីថ្លែងការណ៍ជំទាស់ដល់ដំណើរការនាំខ្លួនជនសង្ស័យបន្ថែមមកកាត់ទោសករណី ០០៣ និង ០០៤។
សាលាក្ដីខ្មែរក្រហមបើកសវនាការដើម្បីពិនិត្យកាយសម្បទា និងស្មារតីរបស់ជនជាប់ចោទពីររូបនៅក្នុងសំណុំរឿង ០០២ គឺលោក នួន ជា និងអ្នកស្រី អៀង ធីរិទ្ធ កាលពីថ្ងៃទី២៩ សីហា ឆ្នាំ២០១១។
អង្គការសហប្រជាជាតិកាលពីថ្ងៃព្រហស្បតិ៍ ទី២០ តុលា បានហាមឃាត់មន្ត្រីរដ្ឋាភិបាលមិនឲ្យនិយាយប៉ះពាល់ដល់កិច្ចការរបស់តុលាការខ្មែរក្រហម ជាពិសេសករណី ០០៣ និង ០០៤ ដែលមានជនសង្ស័យបន្ថែមចំនួន ៥នាក់ ដែលអាចនឹងត្រូវនាំខ្លួនមកកាត់ទោសបន្ថែម។
សេចក្ដីថ្លែងការណ៍របស់សាលាក្ដីខ្មែរក្រហម កាលពីថ្ងៃព្រហស្បតិ៍ បញ្ជាក់ថា មន្ត្រីផ្នែកច្បាប់ និងអគ្គលេខាធិការរងនៃអង្គការសហប្រជាជាតិ អ្នកស្រី ប៉ាទ្រីស៊ីយ៉ា អូប្រាយអេន(Patricia O’ Brien) បានប្រាប់លោក សុខ អាន រដ្ឋមន្ត្រីទីស្ដីការគណៈរដ្ឋមន្ត្រី ហាមឃាត់មិនឲ្យមន្ត្រីរដ្ឋាភិបាលធ្វើសេចក្ដីថ្លែងការណ៍ណាមួយប៉ះពាល់ដល់ដំណើរការសាលាក្ដីខ្មែរក្រហម ជាពិសេស ០០៣ និង ០០៤ និងដំណើរការយុត្តិធម៌ ផ្សេងៗទៀត។
អ្នកស្រីបញ្ជាក់ថា រដ្ឋាភិបាលមានតួនាទីសហការនឹងសាលាក្ដីខ្មែរក្រហម សម្រាប់ដំណើរការកាត់ទោសជនសង្ស័យ។
ដំណើរទស្សនកិច្ចរបស់អ្នកស្រី មន្ត្រីផ្នែកច្បាប់ និងអគ្គលេខាធិការរងនៃអង្គការសហប្រជាជាតិនៅកម្ពុជា ធ្វើឡើងបន្ទាប់ពីសហចៅក្រមស៊ើបអង្កេតសាលាក្ដីខ្មែរក្រហម លោក ស៊ីកហ្រី្វដ ប៊្លុង (Siegfried Blunk) បានលាលែងពីតំណែងរបស់លោក កាលពីថ្ងៃទី១០ ខែតុលា។ លោក ប៊្លុង បានបញ្ជាក់ពីមូលហេតុនៃការលាលែងរបស់លោកថា កាលពីខែឧសភា ឆ្នាំ២០១១ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានអះអាងថា ប្រសិនបើតុលាការខ្មែរក្រហមចង់កាត់ក្ដីករណី ០០៣ និង ០០៤ តុលាការត្រូវតែប្រមូលអីវ៉ាន់ ហើយចាកចេញពីកម្ពុជា។
ចំណែកលោក ហោ ណាំហុង រដ្ឋមន្ត្រីការបរទេស ក៏បានបញ្ជាក់ថា រឿងចាប់ខ្លួនជនសង្ស័យបន្ថែមមកកាត់ទោសជារឿងរបស់រដ្ឋាភិបាលកម្ពុជា ហើយត្រូវកំណត់ដោយកម្ពុជា។ លោក ប៊្លុង បន្តថា កត្តាទាំងនេះហើយជាមូលហេតុដែលលោកមិនអាចធ្វើការដោយឯករាជ្យ និងគ្មានគំនាប។
ឆ្លើយតបទៅនឹងសេចក្ដីថ្លែងការណ៍ហាមឃាត់របស់មន្រ្តីអង្គការសហប្រជាជាតិ ទីស្ដីការគណៈរដ្ឋមន្ត្រីបញ្ជាក់ថា លោក សុខ អាន បានប្រាប់មន្ត្រីច្បាប់អង្គការសហប្រជាជាតិថា ភាគីជាតិ និងអន្តរជាតិ ត្រូវមានសេចក្ដីសម្រេចចិត្តរួមគ្នា ដើម្បីបំបាត់ការបំប៉ោងព័ត៌មាន ការដាក់គំនាប និងការជ្រៀតជ្រែកពីសំណាក់ប្រព័ន្ធផ្សព្វផ្សាយ និងភាគីខាងក្រៅ។
សមាជិកក្រុមប្រឹក្សាជាតិប្រឆាំងអំពើពុករលួយ និងជាអ្នកនាំពាក្យ និងជារដ្ឋលេខាធិការនៃទីស្ដីការគណៈរដ្ឋមន្ត្រី លោក កែវ រ៉េមី នៅសប្ដាហ៍នេះបានបដិសេធការចោទប្រកាន់ថា រដ្ឋាភិបាលបានជ្រៀតជ្រែកដំណើរការសាលាក្ដីខ្មែរក្រហម។
លោក កែវ រ៉េមី បានចោទវិញថា អង្គការសិទ្ធិមនុស្ស និងបណ្ដាញសារព័ត៌មានរបស់សហរដ្ឋអាមេរិក ជាអ្នកនៅពីក្រោយការលាលែងតំណែងរបស់លោក ប៊្លុង៖ «មិនមែនទាក់ទងរដ្ឋាភិបាលទេ គឺគាត់ទាក់ទងនឹងគំនាបពីអង្គការអន្តរជាតិ ដូចជា Human Rights Watch, OSJI ដែលបង្ខំឲ្យគាត់លាលែង និងការយកចំណេញពីអ្នកសារព័ត៌មានខ្លះ ដែលគេហៅថា ជ្រៀតជ្រែកផ្ទៃក្នុង។ ចង់និយាយថា ដូចជា Wall Street Journal ក៏បង្ខំឲ្យគាត់លាលែង ហើយ VOA ក៏អ៊ីចឹងដែរ នៅបន្តកិច្ចសម្ភាសន៍កកូរកកាយក្នុងប្រព័ន្ធយុត្តិធម៌តុលាការកូនកាត់របស់យើងនេះ។ អ៊ីចឹងតាមពិតអ្វីដែលគាត់លាលែង ដោយសារតែរងសម្ពាធអ្នកអស់ហ្នឹងទេ...»។
សេចក្ដីថ្លែងការណ៍ទីស្ដីការគណៈរដ្ឋមន្ត្រីបញ្ជាក់បន្ថែមថា លោក សុខ អាន និងមន្ត្រីអង្គការសហប្រជាជាតិ បានផ្ដោតសំខាន់ចំពោះសំណុំរឿង ០០២ ជាសំណុំរឿងសំខាន់បំផុតនៃប្រវត្តិសាស្ត្រតុលាការយុត្តិធម៌។ សាលាក្ដីខ្មែរក្រហម នឹងបើកសវនាការករណី ០០២ នៅថ្ងៃទី២១ ខែវិច្ឆិកា ខាងមុខនេះ៕
No comments:
Post a Comment