2011-11-21
អង្គភាពប្រឆាំងអំពើពុករលួយបានបង្ហាញថា អំពើពុករលួយរបស់មន្រ្តីក្នុងក្រសួងនានាបានកើតឡើងយ៉ាងគំហុក ចាប់តាំងពីឆ្នាំ១៩៩៣ មក ហើយបានបន្តរហូតដល់បច្ចុប្បន្ន។
តំណាងក្រសួងនានា រួមមានក្រសួងការបរទេស ក្រសួងមហាផ្ទៃ ក្រសួងសង្គមកិច្ច និងអតីតយុទ្ធជន ព្រមទាំងក្រសួងការងារ និងបណ្ដុះបណ្ដាលវិជ្ជាជីវៈ ជាដើម សុទ្ធតែបានទទួលស្គាល់ថា កន្លងមកពិតជាមានអំពើពុករលួយនៅក្នុងស្ថាប័នរបស់ខ្លួនប្រាកដមែន។
ក្នុងកិច្ចប្រជុំពិភាក្សានៅអង្គភាពប្រឆាំងអំពើពុករលួយ កាលពីថ្ងៃទី១៥ ខែវិច្ឆិកានេះ មន្ត្រីតំណាងក្រសួងទាំងអស់បានលើកអំពីមូលហេតុថា ដោយសារតែប្រាក់ខែមន្ត្រីរាជការទាប មិនអាចទ្រទ្រង់ជីវភាពរស់នៅបានទើបធ្វើឲ្យមានការទទួលយកសំណូក ឬបង្ខំឲ្យគេសូកជាដើម។
តើហេតុផលទាំងនេះត្រឹមត្រូវដែរ ឬទេ?
លោក រ៉ុង ឈុន ប្រធានសមាគមគ្រូបង្រៀនឯករាជ្យ។ លោកបានកត់សំគាល់ទៅលើវិស័យអប់រំសិក្សាថា បញ្ហាប្រាក់បៀវត្សរ៍ទាប គឺជាចំណែកមួយ ប៉ុន្តែសំខាន់គឺត្រូវពិនិត្យមើលអំពើពុករលួយនៃមន្ត្រីថ្នាក់លើ ៖ «ដូចជាករណីលោកគ្រូអ្នកគ្រូយកលុយពីសិស្សបន្តិចបន្តួច គ្រាន់តែបង្គ្រប់ក្រពះខ្លួន ហើយយើងបោសពីក្រោមឡើងទៅលើ មិនមានប្រសិទ្ធភាពទេ។ យន្តការដើម្បីបំបាត់នូវអំពើពុករលួយ យើងត្រូវបោសសំអាតពីលើចុះមកក្រោម អាហ្នឹងហើយដែលមានប្រសិទ្ធភាព។ បើយើងផ្ដោតទៅលើស្ថាប័នអប់រំ យើងត្រូវបោសសំអាតពីរដ្ឋមន្ត្រីក្រសួងអប់រំ រដ្ឋលេខាធិការ អនុរដ្ឋលេខាធិការ រហូតមក។ បើថ្នាក់លើអត់មានអំពើពុករលួយ លោកគ្រូអ្នកគ្រូក៏គាត់មិនអាចប្រព្រឹត្តិអំពើពុករលួយបន្តិចបន្តួចនោះបានដែរ...»។
ចំណែកលោក យ៉ា ណាវុធ នាយកប្រតិបត្តិនៃអង្គការ «ខារ៉ាមកម្ពុជា» បានសំដែងនូវការយល់ស្របគ្នាថា បញ្ហារដ្ឋផ្ដល់ប្រាក់ខែទាប ខ្វះសម្ភារៈ និងថវិកា សម្រាប់មន្ត្រីរាជការបំពេញការងារ គឺជាផ្នែកមួយដែលនាំឱ្យមានអំពើពុករលួយនៅតាមក្រសួងនានា។ ប៉ុន្តែលោកបានគូសបញ្ជាក់ថា កត្តាសំខាន់គឺការអនុវត្តច្បាប់ដោយត្រឹមត្រូវឥតលំអៀង ៖ «មិនប្រកាន់ថា អ្នកនេះអ្នកនយោបាយ អ្នកនោះមន្ត្រីរាជការតូចតាច អត់បែងចែកឋានៈថាអ្នកធំ អ្នកតូច អ្នកមានអ្នកក្រនោះទេ។ គោលការណ៍ច្បាប់ គឺស្មើភាពគ្នា។ ចំណុចទី២ គឺថា ប្រសិនប្រទេសយើងអាចរៀបចំដំឡើងប្រាក់បៀវត្សរ៍ឱ្យបានខ្ពស់ ឱ្យសមនឹងតម្លៃទីផ្សារ ដែលប្រជាពលរដ្ឋយើងអាចរស់បាន ដែលមន្ត្រីរាជការអាចរស់បាន ពេលចុះទៅខេត្ត មានប្រាក់បេសកកម្ម ខ្ញុំជឿថា អាចជួយបានច្រើនក្នុងការអនុវត្តកាត់បន្ថយអំពើពុករលួយ»។
ប៉ុន្តែលោក ឱម យិនទៀង ប្រធានអង្គភាពប្រឆាំងអំពើពុករលួយនៅក្នុងកិច្ចប្រជុំនោះ ពុំយល់ស្របចំពោះការលើកឡើងរបស់មន្ត្រីតំណាងក្រសួងនានា អំពីបញ្ហាប្រាក់ខែទាប ហើយថាចាំឱ្យរដ្ឋដំឡើងប្រាក់ខែមន្ត្រីរាជការឱ្យចាយគ្រប់សិន ទើបចាប់ផ្ដើមទប់ស្កាត់អំពើពុករលួយនោះទេ។
លោក សុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា។ លោកបានបង្ហាញនូវការយល់ស្របជាមួយលោក ឱម យិនទៀង ត្រង់ចំណុចនេះ ប៉ុន្តែលោកបានបញ្ជាក់ថា ប្រសិនបើមន្ត្រីរាជការមានប្រាក់បៀវត្សរ៍គ្រប់គ្រាន់ អាចជាកត្តាមួយជួយកាត់បន្ថយអំពើពុករលួយបានមួយចំណែក ៖ «អំពើពុករលួយនេះ គឺមានកត្តាច្រើន ហើយកត្តាដែលធំបំផុតនោះ គឺការអនុវត្តច្បាប់។ ប្រសិនការអនុវត្តនោះនៅតែគិតថាប្រាក់ខែតិច មិនហ៊ានធ្វើ មិនដឹងជាឆ្នាំណាទើបអាចអនុវត្តច្បាប់ប្រឆាំងអំពើពុករលួយនោះបានទេ។ ចំពោះមន្ត្រីរាជការ ដែលមានប្រាក់ខែទាបនោះ ព្រោះគាត់អត់បានធ្វើការរកស៊ីអ្វីផ្សេងទៀតទេ គាត់បំពេញការងារឱ្យរដ្ឋ ហេតុនេះគាត់ក៏ត្រូវការរស់ដែរ សិទ្ធិរស់រានរបស់គាត់ ឱ្យបានរស់រានដោយសមរម្យ។ ហេតុដូច្នេះ រដ្ឋត្រូវតែរកមធ្យោបាយដើម្បីដំឡើងប្រាក់បៀវត្សរ៍ឱ្យមន្ត្រីរាជការទាំងអស់ អាចធ្វើការដោយរស់រាន ដោយសមរម្យ អាហ្នឹងគឺជារឿង ជាភារកិច្ចរបស់រដ្ឋ។ ការផ្ដល់ប្រាក់បៀវត្សរ៍ដល់មន្ត្រីរាជការឱ្យបានគ្រប់គ្រាន់ ជាកត្តាមួយជួយកាត់បន្ថយអំពើពុករលួយដែរ នេះជាចំណុចមួយ»។
នៅក្នុងកិច្ចប្រជុំកាលពីថ្ងៃទី១៥ ខែវិច្ឆិកានេះ តំណាងក្រសួងមហាផ្ទៃបានលើកឡើងថា អំពើពុករលួយបានកើតឡើងតាមដងផ្លូវ តាមពន្ធនាគារ។ ក្រៅពីរដ្ឋផ្ដល់ប្រាក់ខែមន្ត្រីប៉ូលិសនគរបាលទាប ចាយវាយមិនគ្រប់ហើយនោះ រដ្ឋខ្វះខាតសម្ភារៈ និងថវិកាសម្រាប់ប៉ូលិសចុះអនុវត្តការងារថែមទៀត គឺប្រាក់ឧបត្ថម្ភរបស់រដ្ឋលំបាកបើកមិនបានភ្លាមៗទេ ហើយបើនៅតាមខេត្ត ប្រាក់បេសកកម្មពេលខ្លះអាចយឺតយ៉ាវរហូតដល់ ១ឆ្នាំក៏មាន។ នៅពន្ធនាគារខ្លះ ខ្វះទាំងមធ្យោបាយដឹកអ្នកទោស ជួនកាលខ្ចីឡានគេ ជួនកាលជួលឡានដឹកអ្នកទោសក៏មាន។ ទាំងនេះហើយ ដែលជាមូលហេតុនាំឱ្យកើតជាបញ្ហាយកប្រាក់សេវាកម្មផ្សេងៗ នៅក្នុងក្របខ័ណ្ឌជំនាញ។
ចំពោះបញ្ហាអំពើពុករលួយដែលទាក់ទងទៅនឹងការយកតម្លៃសេវាផ្សេងៗមិនស្របច្បាប់នេះ អង្គភាពប្រឆាំងអំពើពុករលួយបានស្នើឱ្យក្រសួងនីមួយៗ រៀបចំដាក់បញ្ចូលឱ្យក្លាយទៅជាតារាងតម្លៃសេវាស្របច្បាប់ ដើម្បីឲ្យក្រសួងហិរញ្ញវត្ថុពិនិត្យសម្រេចថាតើគួរយកតម្លៃសេវានោះត្រឹមណា ឬមិនគួរ។
ត្រង់ចំណុចនេះ លោកមេធាវី សុខ សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានបកស្រាយវិធាននេះទៅតាមលក្ខណៈច្បាប់ ដោយផ្ដោតទៅលើបញ្ហាដែលកើតមានឡើងនៅតាមពន្ធនាគារកន្លងមក ៖ «...រឿងពាក់ព័ន្ធនឹងពន្ធនាគារ គឺវាខុសពីក្រសួងមន្ទីរផ្សេងៗទៀត។ ក្រសួងមន្ទីរផ្សេងៗទៀត គឺប្រជាពលរដ្ឋផ្ដល់សេវាផ្សេងៗ ឱ្យខ្លួន។ ក៏ប៉ុន្តែរឿងពន្ធនាគារមិនមែនអ៊ីចឹងទេ គឺជាសិទ្ធិ ហើយការលេងសួរសុខទុក្ខក៏ជារឿងសិទ្ធិសេរីភាព ហើយការថែទាំអ្នកទោសនៅក្នុងពន្ធនាគារ ក៏ជារឿងសិទ្ធិសេរីភាព ព្រោះថារដ្ឋបានយកគេទៅឃុំខ្លួន ទោះជាមានទោសហើយក៏ដោយ មិនទាន់មានទោសក៏ដោយ។ ហេតុដូច្នេះមានតែរដ្ឋហ្នឹង រកមធ្យោបាយផ្ដល់ទៅពន្ធនាគារ ផ្ដល់ប្រាក់បៀវត្សរ៍ទៅមន្ត្រីនគរបាលនៅពន្ធនាគារឱ្យបានគ្រប់គ្រាន់ ផ្ដល់អគារ ឬម្ហូបអាហារដល់អ្នកទោសឱ្យបានគ្រប់គ្រាន់ អាហ្នឹងគឺជាភារកិច្ចរបស់រដ្ឋ»។
រីឯលោក យ៉ាណាវុធ នាយកប្រតិបត្តិនៃអង្គការខារ៉ាមកម្ពុជា បានវិភាគថា យន្តការនេះអាចជួយសម្រាលបញ្ហាលំបាកខ្លះរបស់ពលករ-ពលការិនីខ្មែរ ពិសេសអ្នកដែលត្រូវចេញធ្វើការនៅក្រៅប្រទេស ៖ «...សេវាពិនិត្យសុខភាព ពេលដែលពលករលោកចេញទៅក្រៅប្រទេស ទី២ ឧទាហរណ៍តម្លៃប៉ាសស្ព័រ ដាក់ទៅក្នុងតារាងឱ្យច្បាស់លាស់ ថាយកតម្លៃលើលិខិតឆ្លងដែនប៉ុន្មាន ពិនិត្យសុខភាពប៉ុន្មាន តម្លៃបង់ផ្លូវច្បាប់ផ្សេងៗ ប៉ុន្មាន។ កាលណារៀបចំតារាងហ្នឹងច្បាស់លាស់ ហើយមានការផ្សព្វផ្សាយហើយ ប្រជាពលរដ្ឋ ជាពិសេសពលករ លោកប្រាកដជាដឹងហើយ អ៊ីចឹងមិនអាចបង់តម្លៃអ្វីឱ្យខ្ពស់លើសពីអ្វីដែលខាងក្រសួងបានកំណត់ទេ»។
ប៉ុន្តែលោក រ៉ុង ឈុន ប្រធានសមាគមគ្រូបង្រៀនឯករាជ្យបានចាត់ទុកយន្តការកំណត់តារាងតម្លៃសេវានេះ ថាមានប្រសិទ្ធភាពតិចតួចក្នុងការទប់ស្កាត់ បំបាត់អំពើពុករលួយនៅតាមក្រសួងនានា ៖ «...រឿងពុករលួយ ដែលមន្ត្រីមានអំណាច មានតួនាទីធំៗ គេពុករលួយលុយច្រើនជាងលុយសេវា លុយសេវានេះ គ្រាន់តែជារឿងបន្ទាប់បន្សំទេ។ ហេតុផលយើងមើលឃើញនៅក្នុងក្រសួងសង្គមកិច្ចថ្មីៗនេះ មន្ត្រីធំៗ ដែលលួចលុយជាតិ ៥លានដុល្លារ ហើយថ្នាក់ដឹកនាំស្ថាប័នហ្នឹងបានទទួលកំហុសថា ខ្លួនបានប្រព្រឹត្តិ ខ្លួនបានធ្វើឱ្យបាត់លុយពិតប្រាកដមែន។ សំណុំរឿងទាំងអស់ហ្នឹង ត្រូវបានក្រសួងសេដ្ឋកិច្ច និងហិរញ្ញវត្ថុបិទសំណុំរឿងហ្នឹង ហើយថ្មីៗនេះ ប្រធានអង្គភាពប្រឆាំងអំពើពុករលួយក៏បានលើកឡើងថា រឿងហ្នឹងត្រូវបិទតែសំណុំរឿង។ អាហ្នឹង ដែលវាអត់ប្រសិទ្ធភាព ហើយធ្វើឱ្យប្រជារាស្ត្រពលរដ្ឋ ដែលគេខំតាមសម្លឹងមើល បែរជាខកចិត្តទៅវិញ»។
ជុំវិញយន្តការរបស់អង្គភាពប្រឆាំងអំពើពុករលួយ ក្នុងការកោះប្រជុំពិភាក្សាស្វែងរកដំណោះស្រាយ ដើម្បីកាត់បន្ថយអំពើពុករលួយនៅតាមក្រសួងរដ្ឋនានានេះ មន្ត្រីគណបក្សប្រឆាំង និងអង្គការពុំមែនរដ្ឋាភិបាលខ្លះទៀតបានចាត់ទុកថា គឺជាជំហានមួយបង្ហាញពីការខិតខំប្រឹងប្រែងរបស់រដ្ឋាភិបាល។ ប៉ុន្តែបានគូសបញ្ជាក់ដូចៗគ្នាថា អង្គភាពប្រឆាំងអំពើពុករលួយត្រូវតែមានជំហរឯករាជ ដោយមិនត្រូវមានមន្ត្រីរដ្ឋាភិបាលជាបង្អែកឡើយ។ នោះទើបការអនុវត្តច្បាប់ក្នុងការចាប់ខ្លួនជនប្រព្រឹត្តពុករលួយទាំងថ្នាក់ដឹកនាំជាន់ខ្ពស់ ទាំងមន្ត្រីតូចតាច ព្រមទាំងការដាក់ទោសទណ្ឌដល់ជនប្រព្រឹត្តអំពើពុករលួយ អាចប្រព្រឹត្តិទៅបានដោយមិនលំអៀង ប្រកបដោយគតិយុត្តិ៕
No comments:
Post a Comment