ដោយ រដ្ឋា វីសាល
2011-10-31
មន្ត្រីមូលដ្ឋានខេត្តរតនគិរី បានឲ្យដឹងថា គេរកឃើញសកម្មភាពលួចកាប់ឈើប្រណិតចេញពីតំបន់សួនឧទ្យានជាតិវីរជ័យ ដើម្បីធ្វើអាជីវកម្មខុសច្បាប់។ ប៉ុន្តែ មន្ត្រីមូលដ្ឋានបានអះអាងថា អ្នកលួចកាប់ឈើនោះ គឺជាប្រជាពលរដ្ឋក្នុងសហគមន៍នៅតំបន់នោះ។
ឈើប្រណីតប្រភេទឈើបេងប្រមាណ ១០០ សន្លឹក ដែលមានបរិមាណជាង ៣ ម៉ែត្រគីប ត្រូវបានក្រុមសមត្ថកិច្ចចម្រុះនៃអាជ្ញាធរខេត្តរតនគិរី ចាប់រឹបអូសបានពីសកម្មភាពលួចកាប់ឈើនាំចេញពីសួនឧទ្យានជាតិវីរជ័យ។
ក្រុមសមត្ថកិច្ចបានរកឃើញឈើប្រណិតនេះត្រូវគេអារយកមកលាក់ទុកនៅចំណុចព្រៃអូរអាឡៃ ក្នុងភូមិឡាវ៉ឺយ ឃុំកុកឡាក់ ស្រុកវ៉ឺនសៃ ជាប់នឹងសួនឧទ្យានជាតិវីរជ័យ កាលពីថ្ងៃទី ៣០ ខែតុលា ឆ្នាំ ២០១១ ហើយនៅវេលាយប់ថ្ងៃដដែលនោះ គេឃើញក្រុមសមត្ថកិច្ច ដែលមានមន្ត្រីព្រៃឈើ និងមន្ត្រីយោធាបានដឹកជញ្ជូនឈើនោះនាំចេញកាន់ទីរួមខេត្តរួចហើយ។
ជំទប់ទីមួយឃុំកុកឡាក់ គឺលោក ផុន សឿង។ លោកបានបញ្ជាក់ថា ក្រុមសហគមន៍ភូមិឡាវ៉ឺយ គឺជាអ្នកជាប់ពាក់ព័ន្ធលួចកាប់ឈើនោះ បំណងលក់ចេញទៅឲ្យឈ្មួញអ្នកប្រមូលទិញនាំចេញ។ ក៏ប៉ុន្តែ លោកមិនបានបញ្ជាក់ថា តើក្រុមសហគមន៍នោះមានឈ្មោះអ្វីខ្លះនោះទេ។
លោកបន្តថាមិនទាន់ឃើញមានប្រជាពលរដ្ឋជាសហគមន៍ណាម្នាក់ត្រូវឃាត់ខ្លួនក្នុងករណីលួចកាប់ឈើនោះនៅឡើយទេ។
លោក ផុន សឿង៖ «វាកាប់ឈើនៅអាព្រៃការពារកាប់ហើយ ទៅទុកនៅក្រោយភូមិហ្នឹង។សហគមន៍ហ្នឹងហើយទៅកាប់ឈើហ្នឹងមិនប្រាប់យើងទេ ទៅកាប់លួចៗ ដីវីរជ័យហ្នឹងណា!»។
អាជ្ញាធរខេត្តរតនគិរី កាលពីសប្ដាហ៍មុននេះ បានចាប់ឃាត់ខ្លួនជនជាតិវៀតណាមចំនួនពីរក្រុមមានគ្នា ៥ នាក់ ដែលលួចឆ្លងដែនពីប្រទេសវៀតណាមចូលមកក្នុងតំបន់សួនឧទ្យានជាតិវីរជ័យ ក្នុងខេត្តរតនគិរី។ ក្នុងនោះជនជាតិវៀតណាមម្នាក់ជាប់ទាក់ទិននឹងការចោទប្រកាន់ពីបទចូលមកប្រមាញ់សត្វកម្រ និង ៤ នាក់ទៀតជាប់ចោទពីបទចូលមកកាប់ឈើនៅក្នុងឧទ្យានជាតិដោយខុសច្បាប់។ជនជាតិវៀតណាមទាំង ៥ នាក់នេះ បានជាប់ឃុំខ្លួននៅពន្ធនាគារខេត្តរួចហើយ។
នៅថ្ងៃចន្ទ ទី ៣១ ខែតុលា ឆ្នាំ ២០១១ វិទ្យុអាស៊ីសេរី មិនអាចទាក់ទងនាយខណ្ឌរដ្ឋបាលព្រៃឈើខេត្តរតនគិរី ដើម្បីបញ្ជាក់ពីករណីរកឃើញឈើប្រណិត ដែលគេកាប់ខុសច្បាប់នោះបាននៅឡើយ។
ទោះជាយ៉ាងនេះក្ដី ព្រះរាជអាជ្ញារងអមតុលាការខេត្តរតនគិរី លោក រស់ សារ៉ាំ បានបញ្ជាក់ថា លោកបានទទួលសេចក្ដីរាយការណ៍តាមទូរស័ព្ទពីករណីនេះហើយ គឺឈើដែលរឹបអូសបាន មានចំនួនប្រមាណ ៨០ សន្លឹក។ ក៏ប៉ុន្តែ លោកមិនទាន់បានដឹងថា តើស្ថាប័នជំនាញព្រៃឈើចាត់វិធានការបែបណានៅឡើយទេក្នុងរឿងនេះ។
លោក រស់ សារ៉ាំ៖ «គ្រាន់ឮសូរថាចាប់បានឈើជាបន្ទះៗ ជាចំនួនសន្លឹក។ ដូចជាអត់មាននរណារាយការណ៍ពីរឿងចាប់មនុស្សទេ ថាវានៅខាងក្រោយចម្ការរបស់គេ។ខ្ញុំថាអ៊ីចឹងដាក់កម្លាំងឲ្យយាមទៅ ប៉ុន្តែ ប្រើកម្លាំងមនុស្សឲ្យបានច្រើន ហើយតាំងពីហ្នុងមកអត់ឃើញនរណារាយការណ៍ឲ្យខ្ញុំទៀតទេ»។
ឈើប្រណិត និងឈើមានតម្លៃជាច្រើន ត្រូវបានក្រុមសមត្ថកិច្ចរកឃើញមានគេលួចកាប់ និងអារច្រៀកនាំចេញទៅទីផ្សារពីសួនឧទ្យានជាតិវីរជ័យជាបន្តបន្ទាប់ នៅប៉ុន្មានឆ្នាំកន្លងទៅនេះ ជាពិសេស តំបន់កន្ទុយនាគ ដែលកើតមានរឿងអាស្រូវលួចកាប់ឈើដ៏ច្រើនសន្ធឹកសន្ធាប់នាំចេញទៅប្រទេសវៀតណាមខុសច្បាប់ កាលពីពាក់កណ្ដាលឆ្នាំ ២០០៤ ពាក់ព័ន្ធទៅនឹងអតីតមន្ត្រីអាជ្ញាធរខេត្តរតគិរីចំនួន ១១ នាក់។
សេចក្ដីរាយការណ៍ពីបុគ្គលិកបណ្ដាក្រុមហ៊ុនសម្បទានសេដ្ឋកិច្ច ដែលទទួលបានសិទ្ធិវិនិយោគនៅតំបន់សួនឧទ្យានជាតិវីរជ័យសុំមិនឲ្យបញ្ចេញឈ្មោះ បានឲ្យដឹងថា ចាប់តាំងពីដើមឆ្នាំ ២០១១ រហូតបច្ចុប្បន្ន មានក្រុមជនជាតិវៀតណាមជាក្រុមៗ រាប់រយនាក់ ភាគច្រើនជាអ្នកប្រើប្រាស់គ្រឿងញៀន បានឆ្លងចូលមកតំបន់កន្ទុយនាគ ដើម្បីកាប់ឈើគ្រញូងដោយមិនខ្លាចញញើត និងក្រុមសមត្ថកិច្ចការពារព្រំដែននៅតំបន់នោះឡើយ៕
No comments:
Post a Comment