សមាជិកសភាស្នើឱ្យរដ្ឋាភិបាលពិនិត្យការផ្ដល់ដីសម្បទានសេដ្ឋកិច្ចឡើងវិញ
ដោយ កេសរណ្ណីយ្យា
2011-09-09
សមាជិកសភានៃគណបក្ស សម រង្ស៊ី លោក សុន ឆ័យ បានស្នើសុំឱ្យរាជរដ្ឋាភិបាលពិនិត្យឡើងវិញនូវរាល់ការផ្ដល់ដីសម្បទានសេដ្ឋកិច្ចទាំងឡាយដែលមានរយៈពេល ៩៩ឆ្នាំ ឱ្យក្រុមហ៊ុនបរទេសដើម្បីលុបចោលសម្បទានទាំងនោះជាបន្ទាន់។
តំណាងរាស្រ្ដគណបក្ស សម រង្ស៊ី លោក សុន ឆ័យ
នៅក្នុងលិខិតជូនប្រធានរដ្ឋសភា លោក ហេង សំរិន កាលពីថ្ងៃពុធ ទី៧ ខែកញ្ញា លោក សុន ឆ័យ បានសរសេរគូសបញ្ជាក់ថា ការផ្ដល់ដីសម្បទានសេដ្ឋកិច្ចទាំងនោះនឹងនាំមកនូវគ្រោះថ្នាក់ធ្ងន់ធ្ងរដល់អធិបតេយ្យភាព និងបូរណភាពទឹកដីជាតិខ្មែរយើង។
ទន្ទឹមគ្នានេះ លោក សុន ឆ័យ ក៏បានទាមទារជាផ្លូវការឲ្យប្រមុខរាជរដ្ឋាភិបាល ចាត់វិធានការបញ្ឈប់ការកាប់បំផ្លាញព្រៃឈើក្នុងតំបន់ព្រៃឡង់ដោយក្រុមហ៊ុនវៀតណាម ឈ្មោះ CRCK និងបានស្នើឲ្យរដ្ឋមន្ត្រីក្រសួងកសិកម្ម មកឆ្លើយបំភ្លឺសំណួរផ្ទាល់មាត់របស់អ្នកតំណាងរាស្ត្រ នៅដើមខែតុលា។
ក្នុងលិខិតដដែលនោះ លោក សុន ឆ័យ បានសរសេរជម្រាបលោក សុខ អាន ឧបនាយរដ្ឋមន្រ្តី និងជារដ្ឋមន្ត្រីទីស្ដីការគណៈរដ្ឋមន្ត្រី ដោយអះអាងថា ការកាប់បំផ្លាញព្រៃឈើបានកើតឡើងក្នុងរូបភាពថ្មី តាមរយៈយកព្រៃស្រោងជាដីសម្បទានសេដ្ឋកិច្ចធ្វើចម្ការកៅស៊ូ។ បទល្មើសថ្មីនេះបានធ្វើឡើងក្រោយពីលោកនាយករដ្ឋមន្ត្រី ហ៊ុន សែន បានចាត់វិធានការតឹងរ៉ឹងបញ្ឈប់ការកាប់បំផ្លាញព្រៃឈើរបស់មន្ត្រីយោធាមួយចំនួនរួចមក។
មកទល់ពេលនេះ ការកាប់បំផ្លាញតំបន់ព្រៃឡង់ នៅតែកើតមានជាបន្តឥតឈប់ ហើយរដ្ឋសភានៅមិនទាន់បានទទួលឯកសារផ្លូវការពីក្រុមហ៊ុនវៀតណាម បញ្ជាក់ពីសិទ្ធិក្នុងការកាប់យកព្រៃក្នុងតំបន់នោះទេ។
មន្ត្រីរដ្ឋាភិបាលមិនទាន់ឆ្លើយតបចំពោះលិខិតរបស់លោក សុន ឆ័យ នៅឡើយទេ៕
.......................................................
Law Journal of Cambodia (LJC) is a non-political and independent team who volunteer working for disseminating law in Cambodia. All our comment or idea of LJC cannot be claimed in front of court and other purpose. LJC just provide ways for people to understand the context of law and other issues. LJC wants people to understand the law and live in peaceful means. If you need inquiry, please drop your e-mail to cambodianlawjournal@gmail.com. Welcome all comments on this blog
No comments:
Post a Comment