Sunday, September 18, 2011

អ្នក​ភូមិ​នៅ​ក្រចេះ​បិទ​ផ្លូវ​ជាតិ​លេខ​៧​តវ៉ា​ពី​បញ្ហា​ដីធ្លី



2011-09-17
ប្រជាពលរដ្ឋ​ជាង ៥០០​នាក់​មក​ពី​ភូមិ​ចំនួន​៦ ក្នុង​ឃុំ​២ នៃ​ស្រុក​ស្នួល ខេត្ត​ក្រចេះ បាន​នាំ​គ្នា​បិទ​ផ្លូវ​ជាតិ​លេខ​៧ មិន​ឲ្យ​រថយន្ត​បើក​បរ​ឆ្លង​កាត់។ ការ​បិទ​ផ្លូវ​នេះ​ដើម្បី​តវ៉ា​ចំពោះ​ក្រុមហ៊ុន​វិនិយោគ​ដែល​បាន​យក​ដី និង​ឈូស​ឆាយ​បំផ្លាញ​ដំណាំ​ពួកគាត់។
RFA/Keo Nimorl
ប្រជាពលរដ្ឋ​មក​ពី​ភូមិ​ចំនួន​៦ បិទ​ផ្លូវ​ជាតិ​លេខ​៧ ​មិន​ឲ្យ​អ្នក​ដំណើរ​ធ្វើ​ចរាចរណ៍ ដើម្បី​តវ៉ា​រឿង​ក្រុមហ៊ុន​យក​ដី​ប៉ះ​ដី​ចម្ការ​ពួក​គាត់​នៅ​ឃុំ​ស្វាយជ្រះ ស្រុក​ស្នួល ខេត្ត​ក្រចេះ នៅ​ថ្ងៃ​ទី​១៧ ខែ​កញ្ញា ឆ្នាំ​២០១១។
យានយន្ត​ជា​ច្រើន​គ្រឿង​ដែល​ធ្វើ​ដំណើរ​លើ​ផ្លូវ​ជាតិ​លេខ​៧ ពី​ភ្នំពេញ ទៅ​ក្រចេះ ត្រូវ​ជាប់​គាំង​ត្រង់​ចំណុច​មុខ​សាលា​ឃុំ​ស្វាយជ្រះ ជាង ៤​ម៉ោង នៅ​ថ្ងៃ​ទី​១៧ ខែ​កញ្ញា​នេះ។
អ្នក​ភូមិ​បាន​និយាយ​ថា ការ​បិទ​ផ្លូវ​នេះ​ដើម្បី​ឲ្យ​អាជ្ញាធរ​ថ្នាក់​ខេត្ត និង​ក្រសួង​ជំនាញ​នានា​បាន​ដឹង​ឮ និង​ជួយ​អ្នក​ស្រុក​ក្នុង​ការ​ទាមទារ​ឲ្យ​ក្រុមហ៊ុន​វិនិយោគ​ដី​ដាំ​ដំណាំ​ឧស្សាហកម្ម នៅ​ឃុំ​ស្វាយជ្រះ កាត់​ដី​ដំណាំ​ចំនួន ៥.៦០០​ហិកតារ​របស់​ប្រជាជន​ចេញ​ពី​ទំហំ​ដី​រួម​របស់​ក្រុមហ៊ុន ដែល​មាន​ចំនួន ២៦.០០០​ហិកតារ។
ក្រុមហ៊ុន​ដែល​មាន​ទំនាស់​ជាមួយ​អ្នក​ភូមិ​នោះ​មាន​ឈ្មោះ​ថា ឌូវទៀន រ៉ាប់ប័រ និង ឌូវទៀន ក្រចេះ។ ភូមិ​ទាំង​៦ ដែល​មាន​ប្រជាជន​មក​តវ៉ា​មាន ៥​ភូមិ មក​ពី​ឃុំ​ស្វាយជ្រះ គឺ​ភូមិ​រំពុក ដូនមារ តាសោម ស្រែចារ តាពុម។ ចំណែក​ភូមិ​មួយ​ទៀត​ដែល​បាន​ចូលរួម​ដែរ គឺ​ភូមិ​ចឹង នៃ​ឃុំ​ខ្សឹម។
ការ​បិទ​ផ្លូវ​ជាតិ​លេខ​៧​នេះ ចាប់​ផ្ដើម​ពី​ម៉ោង ៨​ព្រឹក​ដោយ​មាន​ដាក់​ឈើ​សសរ​ធំៗ​រាំង​ផ្លូវ និង​មាន​មនុស្ស​ប្រុស​ស្រី​នាំ​គ្នា​អង្គុយ​ស្ទាក់​លើ​ផ្លូវ​ជាតិ​មិន​ឲ្យ​មាន​យានយន្ត​ឆ្លង​កាត់។ អាជ្ញាធរ​ខេត្ត​ក្រចេះ បាន​បញ្ជូន​ប៉ូលិស និង​ប៉េអឹម​សរុប​ប្រមាណ ៥០​នាក់​ទៅ​កន្លែង​កើត​ហេតុ​តែ​មិន​មាន​ការ​ប៉ះទង្គិច​ណា​មួយ​កើត​មាន​ទេ។
ដោយ​មាន​ការ​ចរចា​ជា​ច្រើន​លើក​ចូល​រួម​ពី​លោក អឿ ស៊ីយ៉ែម អភិបាល​រង​ខេត្ត​ក្រចេះ លោក ជួង ស៊ាងហាក់ ស្នងការ​ប៉ូលិស​ខេត្ត និង​លោក ស៊ុំ ជួន គណៈ​អភិបាល​ស្រុក​ស្នួល រួច​មក ប្រជាពលរដ្ឋ​បាន​យល់​ព្រម​លើក​ឈើ​ចេញ បើក​ផ្លូវ​ជាតិ​ឲ្យ​រថយន្ត​នានា​ចរាចរណ៍​ឡើង​វិញ នៅ​ម៉ោង ១២ និង ១៥​នាទី នៅ​ថ្ងៃ​ដដែល។
ក្រុម​ប្រជាពលរដ្ឋ​យល់​ព្រម​បញ្ចប់​ការ​រាំង​ផ្លូវ​ដោយសារ​មាន​កិច្ច​សន្យា​ណាត់​ជួប​គ្នា​ដោះស្រាយ​ម្ដង​ទៀត នៅ​ថ្ងៃ​ទី​២០ ខែ​កញ្ញា ខាង​មុខ នៅ​សាលា​ឃុំ​ស្វាយជ្រះ រវាង​ប្រជាជន និង​អាជ្ញាធរ​មាន​សមត្ថកិច្ច និង​តំណាង​ក្រុមហ៊ុន។
លោក ស៊ុំ ជួន ជា​ប្រធាន​គណៈ​អភិបាល​ស្រុក​ស្នួល។ លោក​បាន​មាន​ប្រសាសន៍​ថា ការ​ណាត់​ជួប​គ្នា​នៅ​ថ្ងៃ​ទី​២០ ខែ​កញ្ញា ខាង​មុខ និង​មាន​តំណាង​ក្រសួង​ជំនាញ​ចូលរួម​ដែរ។
ប្រជាពលរដ្ឋ​មួយ​រូប​ក្នុង​ចំណោម​អ្នក​តវ៉ា បាន​ឲ្យ​ដឹង​ថា បើ​សិន​ជា​ការ​ដោះស្រាយ​នៅ​ថ្ងៃ​២០ មិន​បាន​ជោគជ័យ​តាម​សំណូមពរ​របស់​ប្រជាជន​ទេ គេ​នឹង​បន្ត​ការ​តវ៉ា​បន្ត​ទៅ​ទៀត។
ខេត្ត​ក្រចេះ មាន​ក្រុមហ៊ុន​ប្រមាណ ៤៨ បោះ​ទុន​វិនិយោគ និង​ទទួល​បាន​ដី​សម្បទាន​សេដ្ឋកិច្ច។ ក្នុង​ចំណោម​ស្រុក​ទាំង​៥ របស់​ខេត្ត ស្រុក​ស្នួល មាន​ទំនាស់​ដី​ច្រើន​ជាង​គេ បើ​ប្រៀបធៀប​ជាមួយ​ស្រុក​ផ្សេង​ទៀត​របស់​ខេត្ត។ ស្រុក​ទាំង​៥ មាន​ស្រុក​ចិត្តបុរី ស្រុក​ស្នួល ស្រុក​សំបូរ ស្រុក​ព្រែកប្រសប់ និង​ស្រុក​ឆ្លូង៕
Post a Comment