ដោយ ខែ សុណង
2011-09-17
មន្ត្រីអង្គការមិនមែនរដ្ឋាភិបាលបានសម្ដែងក្ដីព្រួយបារម្ភចំពោះស្ថានភាពសេរីភាពបញ្ចេញមតិរបស់ក្រុមអ្នកការពារសិទ្ធិមនុស្ស និងអ្នកកាសែតនៅកម្ពុជា ថា កំពុងស្ថិតនៅក្នុងស្ថានភាពមួយមានកម្រិតទាប។
ករណីនេះបង្កឲ្យពួកគេបានជាប់បណ្ដឹងនៅតុលាការពីបទបរិហារកេរ្តិ៍ បទញុះញង់ និងផ្សាយព័ត៌មានមិនពិតជាដើម។
មន្ត្រីអង្គការសង្គមស៊ីវិលបានជួបប្រជុំគ្នា ពិភាក្សាពីការអនុវត្តច្បាប់ក្នុងក្រមព្រហ្មទណ្ឌថ្មី ថាគួរតែមានការកែសម្រួលថែមទៀត ពីព្រោះថាការបកស្រាយច្បាប់នេះបានក្លាយទៅជាឧបករណ៍នៃការប្ដឹងផ្ដល់ ប្រឆាំងនឹងសកម្មជនការពារសិទ្ធិមនុស្ស និងប្រជាពលរដ្ឋ នាំឲ្យសេរីភាពបញ្ចេញមតិមានការរឹតត្បិត។
លោក អ៊ិន គា ជាប្រធានសម្របសម្រួលស្ដីទីនៃគណៈកម្មាធិការប្រព្រឹត្តិកម្ម និងជាអគ្គលេខាធិការសមាគមអាដហុក។ លោកមានប្រសាសន៍ថា បុគ្គលិករបស់សមាគមការពារសិទ្ធិមនុស្សអាដហុកចំនួន ៣នាក់នៅខេត្តកំពង់ឆ្នាំង និងខេត្តរតនគិរី កំពុងតែជាប់បណ្ដឹងនៅតុលាការពីបទបរិហារកេរ្តិ៍ និងបទញុះញង់បង្កឲ្យមានអំពើហិង្សា។
លោក អ៊ិន គា មានប្រសាសន៍បន្តថា ៖ «ដោយសារតែមានការប្ដឹងផ្ដល់បែបនេះហើយ បានយើងនៅតែមានការបារម្ភ ជាចំណុចមួយដែលយើងគិតថា សេរីភាពក្នុងការបញ្ចេញមតិនេះវាមិនមានការទូលំទូលាយដូចពីមុន ហើយយើងគិតថា រឿងនេះនៅតែកើតមានតទៅទៀត ការជួយដល់ជនរងគ្រោះវាអាចមានការចុះថយ។ ដោយសារតែច្បាប់យើងមិនបានឲ្យនិយមន័យច្បាស់លាស់ថាស្អីទៅជាបទញុះញង់ ថាតើវាស្ថិតនៅក្នុងលក្ខណៈបទញុះញង់ដែរ ឬអត់?បើយើងគ្រាន់តែការពារមនុស្សឲ្យគាត់ចេះប្រើប្រាស់សិទ្ធិ និងការរំលោភសិទ្ធិ»។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ បានកត់សម្គាល់ថា ក្នុងរយៈពេលប៉ុន្មានឆ្នាំចុងក្រោយនេះ គឺមានការគំរាមកំហែង ប្ដឹងផ្ដល់អ្នកកាសែត និងសកម្មជនអ្នកការពារសិទ្ធិមនុស្ស ដោយថា បានប្រើប្រាស់សិទ្ធិសេរីភាពក្នុងការបញ្ចេញមតិហួសព្រំដែន ជាការញុះញង់ និងបរិហារកេរ្តិ៍។
លោកបន្ថែមថា ៖ «ច្បាប់ដែលមានហើយហ្នឹងគឺថា ឲ្យមានការបកស្រាយឲ្យច្បាស់លាស់ទៅ ឬក៏កែប្រែ ដូចជាអ្នកជំនាញការបារាំង សុំឲ្យមានការពិនិត្យមើលឡើងវិញមាត្រា ៤៩៥ ពីបរិហារកេរ្តិ៍ ម៉្លោះហើយយើងគួរពិនិត្យមើលទៅ ហើយបើថា កែប្រែឲ្យវាងាយសម្រាប់បកស្រាយយកទៅអនុវត្តក៏បាន ហើយកុំឲ្យវាប៉ះពាល់ទៅដល់សិទ្ធិក្នុងការបញ្ចេញមតិខ្លាំងពេក»។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានអះអាងថា ការស្នើសុំឲ្យមានការកែប្រែ ឬធ្វើវិសោធនកម្មនៃច្បាប់នេះ គឺជាសិទ្ធិរបស់ប្រជាពលរដ្ឋទូទៅ។ ប៉ុន្តែការយល់ឃើញថា ច្បាប់នេះគឺជាឧបករណ៍នៃការប្ដឹងផ្ដល់ប្រឆាំងនឹងសកម្មជនការពារសិទ្ធិមនុស្ស និងប្រជាពលរដ្ឋនាំឲ្យសេរីភាពបញ្ចេញមតិមានការរឹតត្បិតនោះ គឺជាការទទួលខុសត្រូវរបស់បុគ្គល។
លោក ផៃ ស៊ីផាន ៖ «អ្នកដែលយល់ឃើញថា ច្បាប់ហ្នឹងជាឧបករណ៍ដើម្បីកម្រិតនៃសេរីភាពបញ្ចេញយោបល់ អ្នកនោះដែលមានឯកទេសត្រូវប្រើប្រាស់ការយល់ដឹងរបស់ខ្លួន ហើយបកស្រាយឲ្យជាវិធី ឬក៏យុទ្ធនាការប្រឆាំងនៃច្បាប់នេះជាសេចក្ដីថ្លៃថ្នូរ ហើយជាអំពើទទួលខុសត្រូវរបស់ជនណាដែលយល់ឃើញអ៊ីចឹង។ ដូច្នេះច្បាប់នេះយើងអាចនិយាយថា ការអនុវត្តច្បាប់ដើម្បីធានានូវសណ្ដាប់ធ្នាប់ ធានានូវការគោរពនូវភាពជាឯកជន និងសេចក្ដីថ្លៃថ្នូរ ព្រមទាំងកិត្តិយសរបស់បុគ្គលម្នាក់ៗ»។
មន្ត្រីអង្គការសិទ្ធិមនុស្សបានលើកឡើងនៅក្នុងសិក្ខាសាលាស្ដីពីច្បាប់ និងសេរីភាពបញ្ចេញមតិ នៅថ្ងៃទី១៦ កញ្ញា ថា ក្នុងក្រមព្រហ្មទណ្ឌថ្មីរបស់ព្រះរាជាណាចក្រកម្ពុជា ដែលបានចូលជាធរមានកាលពីចុងឆ្នាំ២០១០ កន្លងទៅ អាចប៉ះពាល់ដល់សេរីភាពបញ្ចេញមតិ សេរីភាពក្នុងការជួបប្រជុំ និងសេរីភាពក្នុងការបង្កើតសមាគមជាដើម ហើយថា ករណីមួយចំនួនដែលបានកើតឡើងតាមរយៈការប្ដឹងផ្ដល់ប្រឆាំងនឹងសកម្មជន ការពារសិទ្ធិមនុស្ស និងប្រជាសហគមន៍ពីបទបរិហារកេរ្តិ៍ ឬបទញុះញង់ នៅខណៈដែលអ្នកទាំងនេះប្រឈមនឹងអ្នកមានអំណាចក្នុងជម្លោះដីធ្លី ដោយសារតែការបកស្រាយច្បាប់ក្នុងន័យចង្អៀតរបស់មន្ត្រីច្បាប់៕
No comments:
Post a Comment