ពលរដ្ឋបិទផ្លូវជាតិលេខ៤ ដើម្បីតវ៉ារឿងដីធ្លី
ដោយ សេក បណ្ឌិត
2011-10-30
ប្រជាពលរដ្ឋប្រមាណជាង ១០០នាក់ នៅភូមិ៣ សង្កាត់មួយ ក្រុងព្រះសីហនុ ខេត្តព្រះសីហនុ បាននាំគ្នាកាន់បដា និងរូបថតលោកនាយករដ្ឋមន្ត្រី ហ៊ុន សែន និងភរិយា ឈរតវ៉ា និងបិទផ្លូវជាតិលេខបួន ត្រង់ចំណុចសង្កាត់លេខមួយបណ្ដោះអាសន្ន នៅព្រឹកថ្ងៃអាទិត្យ ទី៣០ ខែតុលា ឆ្នាំ២០១១។
ពលរដ្ឋនៅក្រុងព្រះសីហនុកាន់រូបលោកនាយករដ្ឋមន្ត្រី ហ៊ុន សែន តវ៉ារឿងដីធ្លីនៅលើផ្លូវជាតិលេខ៤ កាលពីថ្ងៃទី៣០ តុលា ២០១១
ការទាមទារដោយមានបិទផ្លូវនេះ ក្រុមអ្នកតវ៉ាទាមទារសូមឲ្យតុលាការខេត្តព្រះសីហនុ ផ្អាកសកម្មភាពចុះអនុវត្តសាលក្រមរិបអូសយកដីរបស់ពួកគាត់ ដែលតុលាការគ្រោងធ្វើនៅថ្ងៃទី៤ វិច្ឆិកា ខាងមុខ។
ការបិទផ្លូវដើម្បីតវ៉ានេះ បានបណ្ដាលឲ្យស្ទះចរាចរ មិនអាចឲ្យអ្នកធ្វើដំណើរចេញចូលទៅមកបានឡើយក្នុងរយៈពេលជិត ៤ម៉ោង គិតចាប់ពីម៉ោងប្រមាណ ៨ព្រឹក រហូតដល់ ម៉ោងជិត១២ ថ្ងៃត្រង់។
សមត្ថកិច្ចក្រុងព្រះសីហនុកំពុងព្យាយាមសម្របសម្រួលជាមួយប្រជាពលរដ្ឋអ្នកតវ៉ា សុំឲ្យពួកគាត់ចេញទៅឈរតវ៉ាតាមចិញ្ចើមផ្លូវទាំងសងខាង ដើម្បីសម្រួលចរាចរបើកផ្លូវឲ្យអ្នកដំណើរឆ្លងកាត់ដំបន់នោះ អាចចេញចូលទៅមកបាន។ ប៉ុន្តែក្រុមប្រជាពលរដ្ឋអះអាងថា បើពុំទាន់មានដំណោះស្រាយណាមួយនោះទេ ពួកគាត់ក៏មិនទាន់យល់ព្រមបើកផ្លូវនោះដែរ៕
No comments:
Post a Comment