Friday, September 16, 2011

កម្ម​ករ​រោងចក្រ​​សម្លៀក​​បំពាក់​​២៥០០​​នាក់​​នឹង​​ទទួល​​ការ​​បណ្ដុះ​​បណ្ដាល​​ស្ដី​ពី​​ច្បាប់​​ការងារ


ព័ត៌មានថ្មីៗ 16:09:17, 16 September 2011
កម្មករ-កម្មការិនីរោងចក្រកាត់ដេរសំលៀកបំពាក់នៅកម្ពុជា។រូបភាព ABC ដោយ សយ​ សុភា។
កម្មករ-កម្មការិនីរោងចក្រកាត់ដេរសំលៀកបំពាក់នៅកម្ពុជា។រូបភាព ABC ដោយ សយ​ សុភា។
អ្នក​ត្រួត​ពិនិត្យ​ការងារ​នៅ​តាម​រោង​ចក្រ​កាត់​ដេរ​​​ចំនួន២៥០០​នាក់​មក​ពី​រោង​ចក្រ​ចំនួន​១២៥ ក្នុង​ប្រទេស​កម្ពុជា​នឹង​ទទួល​បាន​ការបណ្តុះ​បណ្តាល​ស្ដី​ពីច្បាប់​ការ​ងារ​។
អង្គការពលកម្មអន្តរជាតិ (ILO) នឹង​បើ​កវគ្គ​បណ្ដុះបណ្ដាល​​ចាប់​ពី​ថ្ងៃ​ទី១៨ ខែកញ្ញានេះ ​តទៅ​សម្រាប់​រយៈ​ពេល​៥​សប្ដាហ៍។
លោក ប៊ុន យិញ ជា​មន្រ្តី​ទំនាក់​ទំនង​​ក្នុងគម្រោងរោងចក្រ​កាន់​តែប្រសើរ​ឡើង​របស់​អង្គការ ILO បាន​ថ្លែង​ប្រាប់​ Radio Australia ​​ថា ILO រំពឹងថាអ្នក​ដែល​បាន​ទទួល​ការ​បណ្ដុះ​បណ្ដាល​នេះ​​នឹង​ផ្សព្វផ្សាយបន្ត​អំពីការយល់ដឹងនេះ​​ទៅដល់​កម្មករ​-កម្មការិនីដទៃទៀត។
ការ​បណ្តុះ​បណ្តាល​នេះ ទទួល​បាន​ការ​គាំទ្រពី​រោង​ចក្រ​កាត់​ដេរ ដោយ​បញ្ជូន​អ្នក​ត្រួត​ពិនិត្យ​ការងារ​របស់​​ខ្លួន​​ម​ក​ចូល​រួម​គំនិតផ្តួច​ផ្តើមនេះ​ដែល​ផ្តោត​លើ​សារៈ​​សំខាន់​​នៃ​ច្បាប់​​ស្តី​ពី​​ការ​ងារ​ដើម្បី​កំណើន​ដ៏រឹងមាំ​នៃ​ឧស្សាហកម្មកាត់ដេរ ព្រម​ទាំង​​ឲ្យ​​អ្នក​ត្រួត​ពិនិត្យការងារ​មាន​​ការ​យល់​ដឹង​​បន្ថែម​​អំ​ពីសិទ្ធិ ​និង​​ការ​ទទួល​ខុស​ត្រូវ​របស់​​ពួក​​គេ​​នៅ​​កន្លែង​​ធ្វើការ ​ក៏​ដូ​ច​​ជា​​តួនាទី​​របស់​​ពួក​គេ។
លោក​ ប៊ុន យិញ មាន​ការ​ជឿជាក់​ផង​ដែរ​ថា​ការ​បណ្ដុះ​បណ្ដាល​នេះ​​នឹង​អាច​ជួយ​កាត់​បន្ថយ​​បញ្ហា​​សុខភាព ​និង​​សុវត្ថិភាព​​ផង​​ដែរ​។ សម្រាប់​​ឆ្នាំ​​២០១១​នេះ កម្មការិនី​ជាង​១០០០​នាក់​បាន​ដួល​​សន្លប់​​នៅ​​ក្នុង​​រោង​ចក្រ​កាត់​​ដេរ​ ហើយក្រុម​​សហជីព​​ការងារ​​និយាយ​​ថា​​ការ​​ដួល​សន្លប់​ទាំង​នោះ គឺ​បាន​​បណ្ដាល​​ដោយ​​បញ្ហា​​ប្រាក់​​ខែ​​ទាប​ ​សុខភាព​​ទន់​ខ្សោយ​​ និង​​បរិស្ថាន​​មិន​​ល្អ​​នៅ​​កន្លែង​​ធ្វើ​​ការ៕
(ដោយ យុទ្ធ ឈាង)

Print | Email   SHARE: del.icio.us | Digg | StumbleUpon | Facebook | Google | AngkorOne
Post a Comment