Friday, September 16, 2011

សង្គម​ស៊ីវិល​ជួប​​តំណាង​អង្គភាព​ប្រឆាំង​អំពើ​ពុករលួយ



2011-07-21
តំណាង​​​​​មន្ត្រី​សង្គម​ស៊ីវិល​​ចំនួន ១៣​អង្គការ បាន​ចូល​ជួប​មន្ត្រី​តំណាង​អង្គភាព​ប្រឆាំង​អំពើ​​ពុករលួយ​ នៅ​ថ្ងៃ​ទី​២១ កក្កដា ដើម្បី​ពិភាក្សា​​គ្នា​អំពី​ការ​បំបាត់​អំពើ​ពុករលួយ។
ចំណុច​សំខាន់ៗ​ដែល​លើក​ឡើង​ក្នុង​កិច្ច​ប្រជុំ​នោះ​រួម​មាន ការ​យក​ពន្ធ​ផ្លូវ និង​ពន្ធ​យានយន្ត​លើស​កំណត់ ព្រម​ទាំង​ការ​ទប់​ស្កាត់​អំពើ​ពុករលួយ​ដែល​នឹង​អាច​កើត​ឡើង​ចំពោះ​ការ​យក​ពន្ធ​លើ​អចលនទ្រព្យ ដែល​រដ្ឋាភិបាល​កម្ពុជា ទើប​តែ​​បង្កើត​នៅ​ពេល​ថ្មី​ៗ​នេះ។ 
លោក សន ជ័យ អ្នក​សម្រប​សម្រួល​បណ្ដាញ​រួប​រួម​ដើម្បី​​គណនេយ្យភាព​សង្គម​នៅ​អាស៊ី​បូព៌ា និង​ប៉ាស៊ីហ្វិក ដែល​បាន​ចូល​រួម​ក្នុង​កិច្ច​ប្រជុំ​នោះ បាន​ឱ្យ​ដឹង​ថា លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុករលួយ មិន​បាន​ចូល​ជួប​ប្រជុំ​ជាមួយ​តំណាង​មន្ត្រី​អង្គការ និង​តំណាង​សង្គម​ស៊ីវិល​ទេ ប៉ុន្តែ​តំណាង គឺ​លោកស្រី ជិន ចាន់មុនី ឧបការី​អង្គភាព​ប្រឆាំង​អំពើ​ពុករលួយ បាន​ជួប​​​ជំនួស។
លោក​បាន​បញ្ជាក់​អំពី​លទ្ធផល​នៃ​កិច្ច​ប្រជុំ​រយៈពេល ២​ម៉ោង​នោះ ៖ «ជា​លទ្ធផល​អង្គភាព​ប្រឆាំង​អំពើ​ពុករលួយ​សន្យា​ថា នឹង​ចាត់​វិធានការ​ម៉ឺងម៉ាត់​លើ​រាល់​ការ​បារម្ភ​របស់​សង្គម​ស៊ីវិល ដូច​ជា​ការ​ប្រមូល​ពន្ធ​លើ​មធ្យោបាយ​ធ្វើ​ដំណើរ និង​ពន្ធ​លើ​អចលនទ្រព្យ និង​ការ​អនុវត្ត​ខុស​ច្បាប់​ចរាចរណ៍ ជា​ពិសេស​ការ​ផាក​ពិន័យ​លើស​ច្បាប់​កំណត់​នេះ...»
នេះ​គឺ​ជា​កិច្ចប្រជុំ​​ប្រចាំ​ឆ្នាំ​រវាង​សង្គម​ស៊ីវិល​ជាមួយ​អង្គភាព​ប្រឆាំង​អំពើ​ពុករលួយ ក្នុង​បំណង​ផ្លាស់ប្ដូរ​យោបល់​គ្នា ដើម្បី​លប់បំបាត់​អំពើ​ពុករលួយ​នៅ​ក្នុង​សង្គម​កម្ពុជា ខណៈ​ដែល​មាន​ការ​រិះគន់​ពី​សង្គម​ស៊ីវិល និង​មន្ត្រី​គណបក្ស​ប្រឆាំង​ថា មន្ត្រី​អង្គភាព​ប្រឆាំង​អំពើ​ពុករលួយ​ជា​មនុស្ស​របស់​រដ្ឋាភិបាល​ ដែល​មិន​អាច​ធ្វើ​អ្វី​ឲ្យ​ប៉ះ​ពាល់​ដល់​មន្ត្រី​រដ្ឋាភិបាល​បាន​ទេ៕

No comments:

Powered By Blogger